Hindi mayaman si Cris Jean Dureal—o mas kilala bilang CJ. Wala siyang branded na damit, walang mamahaling cellphone, at lalong walang bank account na may maraming zero. Pero kung may isang bagay si CJ na hindi kailanman naubos, iyon ay ang ngiti niya.
Lumaki siya sa isang maliit na bahay, sapat lang para sa isang pamilya na puno ng tawanan, simpleng pagkain, at walang sawang pagmamahalan. Para kay CJ, sapat na iyon. Sa kabila ng kahirapan, masaya siya—dahil buo ang pamilya niya.
"CJ, kain na!" sigaw ng mama niya mula sa kusina.
"Sandali lang po!" sagot niya habang inaayos ang buhok sa harap ng basag na salamin. Hindi man perpekto ang repleksyon, pero kuntento siya. Dahil alam niya, mahal siya.
Hindi niya alam na sa likod ng mga ngiting iyon, may lihim na matagal nang itinatago ang pamilya niya—isang katotohanang kayang baguhin ang lahat.
Sa kabilang mundo naman, may isang lalaking isinilang na nasa tuktok ng buhay. Mayaman, edukado, at sanay makuha ang lahat ng gusto. Tahimik siyang nakatira sa isang mundong puno ng luho, pero kulang sa totoong saya.
Hanggang sa araw na iyon.
Isang simpleng araw kung kailan nagtagpo ang dalawang mundong hindi dapat nagtatagpo.
CJ, na masayang naglalakad pauwi, tangan ang supot ng gulay at may mahinang kantang binubulong sa sarili—at siya, na unang beses nakakita ng isang babaeng mahirap pero tila mas mayaman pa sa kanya pagdating sa kaligayahan.
Sa unang sulyap, may kung anong kumurot sa puso niya.
Paano nagagawa ng isang tulad niya na ngumiti ng ganoon kasaya?
At para kay CJ, hindi niya alam na ang lalaking nadaanan niya ay unti-unting magiging dahilan kung bakit masusubok ang lahat ng pinaniniwalaan niya—tungkol sa buhay, pamilya, at pag-ibig.