kahani unki part 2

Maine ab ek naya ghar banane ki sochi par ghar banane ke liye gaon me hamare khet gaon se dur the or mai asi jagah me nahi rahna chahti thi isiliye mai Boht dur gaon ke neeche jungal me nikal padi . Nadi ke kinaare kuch unchaai par maine mehnat kar ke ghar banaane jitni jagah taiyaar kar li . Gaon ke log is jagah ko ya to jungle ki tarah ya shamshaan ki tarah dekhte the par maine usme apni duniya dekhi . Dheere dheere maine ghar banaane ki sab koshish Kari . Apne jewar bech ke ghr ki jameen bech ke jaise taise ghar banana shuru kiya pr mujhe nahi pata tha aage kya kya dekhna padega . Bachhe bhi thode bade ho rhe the ab unko kisi or ke khayaal rakhne ki jarurat nahi thi. Mai subah gaon se paidal apne naye Ghar ko nikal jaati or andhera hone par gaon laut jaati thi . Hamara gaon dur pahaadi ke uppr basa hai or paidal jaane me kam se kam 1 ghante lag jaate the . Tab mai jawaan thi or himmat taakat or kuch karne ka jajba mere hathiyaar the . Mai mehnat karti gayi apne or apne bachho ke bhavishya ke liye logo ne mujhe taane maarne shuru kiye Maine kisi ki nahi suni logo ka khna tha ki "ye to zinda hi preton me shaamil ho gayi hai" ya fir " dekhna ek din isko bhoot pakad kar le jayenge zinda hi " . Par log sirf baate hi kar sakte hai ek bhi hath kabhi madad ke liye nahi badha . maine haarna nahi jaana . fir ek din achaanak raat ko jab mai gaon ki seema tak pahuchi hi thi peeche se kisi ne mere pair pakad liye . Koi insaan nahi tha koi awaaj nahi koi dikhaai nahi deta bas pair jamm gaye koshish ki aage badhne ki par pair nahi uthe. pehli baar maine Darr ka ahsaas kiya par ab mai kya kar sakti thi gaon se kaafi dur sunsaan raste par thi koi madad ki ummeed bhi nhi kar sakti thi . Maine apne kuldevta ko yaad kiya or kaha ki meri madad karo. Achaanak mai us bojh se nikli mera sharir halka mehsus hua mai bina peeche mudey gaon ki or bhaagti hui gayi . Pehle gaon ke mandir me gayi or fir Ghar . Tab ye nahi socha tha ki ye shuruaat hai . Mera maanna tha ki kabhi kabhi galat wakt par insaan galat jagah pahuch jaay to ye ghatnaayein hoti hai par kya kabhi aisa hota hoga ki tum jinhe nahi dekh rahe wo asal me tumhein dekh rahe ho! Maine us jagah ka naam rakha " banswada" . Or aaj ki baat karu to mera basaya banswada Aaj ek naya gaon ban chuka hai 500 se jyada log rhte hai aaj yahaa or alag alag gaon se aake log bas gaye hai mere basaaye banswada me kuch log ise hill station ke roop mai dekhte hai or kuch logo ke liye market ban gya hai or ateet ke panne mere dil me dafan ho kar rh gye hai ....