Wo wapas nahi aayegi."
Papa ne bas itna hi kaha tha.
Unki awaaz me gussa nahi tha… bas tootne ki halki si aahat thi.
Us din mujhe samajh aaya, kuch dhokhe awaaz nahi karte.
Shayad aap soch rahe honge ki meri kahani sirf dard se shuru hoti hai.
Par nahi… ek waqt tha jab hum bohot khush the.
Haan, sach me.
Main Mummy-Papa ke saath ek chhote se kiraye ke ghar me rehti thi.
Dono government school me teacher hain — alag-alag school me unki duty lagti hai.
Shaam ko jab wo school se laut te the na, main daud kar unhe zor se hug kar leti thi.
Kabhi-kabhi unki jeb tak check kar leti thi… chocolate ki umeed me.
Phir ek din kuch alag sa laga.
Mummy aur Papa aapas me kisi baat par baat kar rahe the… par is baar unki awaaz thodi tez thi.
Mujhe samajh nahi aa raha tha wo kis baare me keh rahe hain.
Main TV ke saamne baithi thi, cartoon chal raha tha… lekin dhyaan wahan bilkul nahi tha.
Unki baatein dheere-dheere behes jaisi lagne lagi.
Aise nahi jaise roz ki chhoti-moti nok-jhok hoti hai…
Is baar awaazon me halka sa gussa tha.
Maine pehli baar remote ki awaaz kam kar di thi.
Shayad bina samjhe hi mujhe mehsoos ho gaya tha — kuch theek nahi haiDheere-dheere Mummy ki awaaz tez hone lagi.
Pehle sirf lafz badle the… phir lehja badal gaya.
Main sach me ghabra gayi thi.
Ye waise wali baat nahi thi jahan Mummy thoda gussa karti hain aur Papa hansi me taal dete hain.
Is baar Papa bhi unhe samjhane ki koshish karte-karte khud zor se bolne lage the.
Mujhe kuch samajh nahi aa raha tha.
Bas itna mehsoos ho raha tha ki Mummy kuch chhupa rahi hain…
aur Papa baar-baar keh rahe the,
"Sach bata do… baat khatam ho jayegi."
TV ab bhi chal raha tha, par awaaz bilkul kam thi.Awaazein ab aur tez ho chuki thi.
Mujhe laga shayad baat yahin ruk jayegi… par aisa nahi hua.
Main dheere se apne kamre se bahar jhaank kar dekhne lagi.
Hall me Mummy aur Papa aamne-saamne khade the.
Lafz ab sirf lafz nahi rahe the… unme gussa saaf dikh raha tha.
Phir achanak sab kuch bahut jaldi hua.
Mummy ne haath uthaya.
Papa ek pal ke liye bilkul khamosh ho gaye… phir unhone bhi zor se jawab diya.
Mujhe yaad hai, us pal meri saansen tez ho gayi thi.
Main samajh nahi pa rahi thi ki galti kiski hai… bas itna samajh aa raha tha ki mera ghar pehli baar mujhe ajnabi lag raha tha.
Main darr kar wapas apne kamre me aa gayi.
Cartoon ab bhi chal raha tha, par mujhe uski ek bhi baat sunai nahi de rahi thi.
Screen par rang badal rahe the…
aur meri duniya bhi.Shayad agar us waqt saamne wali aunty darwaza na khatkhataati, to jhagda aur badh jaata.
Wo kisi special sabzi ka dabba lekar aayi thi. Hamesha ki tarah muskurate hue.
Lekin jaise hi unhone andar kadam rakha… unki muskurahat dheere se tham gayi.
"Arey, kya hua? Aap log lad kyun rahe hain?"
Par Mummy-Papa rukne wale nahi the. Awaazein ab bhi tez thi.
Aunty ne phir thoda zor se kaha, "Bas karo, bachchi bhi to hai ghar me."
Tab jaakar dono ek pal ke liye chup hue.
Mummy ne gusse me aunty ki taraf dekh kar kaha,
"Dekhiye na didi, ye mujhse bina wajah lad rahe hain… haath tak utha diya."
Papa ki awaaz ab bhi bhari hui thi.
"Faltu baat mat karo," unhone bas itna kaha.
Main apne kamre ke darwaze ke peeche khadi thi.
Mujhe samajh nahi aa raha tha kaun sach bol raha hai…
Bas itna samajh aa raha tha ki aaj pehli baar mere ghar ka jhagda kisi aur ne dekh liya tha.
Aur mujhe sharm si mehsoos ho rahi thi… bina wajah.Aunty ne kareeb paanch minute tak Mummy-Papa se dheere awaaz me baat ki.
Mujhe unki baatein saaf sunai nahi de rahi thi… bas lafzon ka bojh mehsoos ho raha tha.
Phir achanak sab shaant ho gaya.
Itna shaant, jaise kuch hua hi na ho.
Us raat Papa hall me so gaye.
Mummy aur main bedroom me the.
Main Mummy ke paas leti thi, par unhone mujhse ek baar bhi baat nahi ki.
Main chhat ki taraf dekhte hue soch rahi thi —
kya har ghar me aise hi jhagde hote hain?
Ya sirf mere ghar me kuch toot raha hai?
Mujhe kuch samajh nahi aa raha tha.
Dimag me sab ghoom raha tha… par jawab ek bhi nahi tha.
Subah jab aankh khuli, to sab kuch phir se normal jaisa lag raha tha.
Mummy ne routine ki tarah tayyari ki.
Papa ne kuch nahi kaha.
Main school chali gayi.
Wapas bhi aa gayi.
Jaise zindagi ne decide kar liya ho —
kal jo hua, uska zikr nahi hoga
Kuch din baad sab fir se normal sa ho gaya.
Ghar me phir se wahi routine, wahi school, wahi chaar baje ka intezaar.
Mummy-Papa baat bhi karte the… haste bhi the.
Par pata nahi kyun, unki hansi me pehle jaisi garmaahat nahi thi.
Sab kuch pehle jaisa lag raha tha,
lekin pehle jaisa tha nahi.
Jaise koi darar deewar ke andar chup gayi ho —
dikhti nahi… par hoti zaroor hai.
Main chhoti thi, shayad samajh nahi paati thi.
Par mehsoos sab kar leti thi.Mujhe exact yaad nahi ki jhagde kab shuru hue aur kab ruk gaye.
Bachpan me din ya tareekh yaad nahi rehte… bas kuch tasveerein reh jaati hain.
Jab main Class 2 me thi, tab Mummy ne ek nayi cheez join ki thi.
Shayad koi health ya herbal type ka program tha.
Unka kehna tha ki unhe thoda weight kam karna hai.
Papa hamesha se fit the.
Par Mummy us waqt apni sehat ko lekar thodi conscious rehne lagi thi.
Pehle ghar, school aur main — bas itna hi unki duniya thi.
Lekin dheere-dheere unki routine me kuch aur bhi shamil hone laga.
Meetings… calls… naye log.
Mujhe tab kuch ajeeb nahi laga.
Mujhe to bas itna yaad hai ki Mummy pehle se zyada busy rehne lagi thi.Phir ek din Mummy ko usi kaam ke silsile me bahar jana pada.
Unhe Raigarh jana tha.
Mujhe tab "kaam ke silsile" ka matlab bhi properly nahi samajh aata tha.
Bas itna pata tha ki Mummy kuch dino ke liye ghar par nahi hongi.
Packing ho rahi thi… bag ready ho raha tha…
Aur mujhe lag raha tha jaise ghar me kuch halki si khali jagah ban rahi ho.
Maine shayad normal behave kiya hoga.
Par andar se thoda ajeeb lag raha tha.
Pehli baar Mummy itne door ja rahi thi.Mummy ke jaane ke baad main Papa ke saath hi rehti thi.
Din to kisi tarah nikal jata… par raat ko Mummy bahut yaad aati thi.
Kabhi chupke se ro leti thi… kabhi openly.
Mujhe lagta tha pata nahi Mummy kab wapas aayengi.
Papa shayad sab samajh jaate the.
Wo mujhe hasane ki koshish karte…
Kabhi funny faces bana kar,
kabhi choti-choti baatein karke.
Unhone kabhi mujhe akela feel nahi hone diya.
Par phir bhi… Mummy ki jagah to Mummy ki hi hoti Phir ek din Mummy wapas aa gayi.
Ghar fir se poora lagne laga.
Mujhe laga sab pehle jaisa ho jayega.
Par dheere-dheere ek naya routine shuru ho gaya.
Ab Mummy ka har Saturday-Sunday Raigarh aana-jana hone laga.
Weekend aate hi unki packing shuru ho jaati.
Main unhe dekhte rehti thi…
Kabhi kuch poochti nahi thi.
Bas andar hi andar sochti thi ki kya ye hamesha aise hi chalega?
Papa normal behave karte the,
Mummy bhi normal thi…
Par mujhe lagta tha jaise ghar me koi halki si khamoshi rehne lagiDheere-dheere Mummy ne apni ek team bana li thi.
Wo us health program me kaafi aage badh chuki thi.
Log unhe "coach" bolne lage the.
Mujhe poori tarah samajh nahi tha ki wo kya karti thi…
bas itna pata tha ki unki duniya ab thodi aur badi ho gayi thi.
Par Raigarh ke aane-jaane ke beech…
mujhe ghar ka mahaul kabhi-kabhi ajeeb lagne laga.
Kuch baatein main samajh nahi paati thi.
Kuch cheezein main sun leti thi…
par unka matlab tab clear nahi hota tha.
Mujhe bas itna feel hota tha ki Mummy aur Papa ke beech kuch badal raha hai.
Aur main beech me khadi thi — bina samjhe ki ho kya raha haiMummy Raigarh apne kaam se hi jaati thi.
Unka focus shuru me sirf apni team aur apne kaam par hi tha.
Lekin dheere-dheere… mujhe lagne laga ki unke jaane ke baad kuch badal raha hai.
Shayad unki soch…
Shayad unka behaviour…
Ya shayad mera bachpana hi confuse ho raha tha.
Pehle jo baatein wo Papa se share karti thi,
ab utni khul kar nahi hoti thi.
Ghar me sab normal tha…
par normal ke andar ek halka sa distance aa gaya tha.Dheere-dheere mujhe ek baat samajh aane lagi thi —
Mummy badli nahi thi…
bas Mummy aur Papa ke beech kuch badal raha tha.
Mere saath sab pehle jaisa hi tha.
Wo mujhe pyaar karti thi, baat karti thi, normal rehti thi.
Par Papa ke saath unki baaton me pehle wali halka-pan nahi tha.
Hasi kam ho gayi thi.
Baaten chhoti ho gayi thi.
Kabhi-kabhi ghar me ajeeb si khamoshi reh jaati thi —
bina kisi jhagde ke bhi.
Main chhoti thi… par itni bhi chhoti nahi thi
ki ye mehsoos na kar paun ki kuch theek nahi hai.Ek baar Mummy mujhe bhi apne saath Raigarh le gayi.
Mujhe laga shayad ye trip thoda special hoga… kyunki main bhi saath thi.
Wahan jaakar maine dekha ki hum ek ladke ke saath car me kahin ja rahe the.
Mummy uske saath front seat par baith gayi…
aur main piche akeli baith gayi.
Shayad ye normal hi ho…
par us waqt mujhe ajeeb laga.
Mujhe laga Mummy mere saath piche baithengi.
Par unhone nahi baitha.
Mujhe nahi pata tha hum kahan ja rahe the…
Bas car chal rahi thi…
aur mere dimaag me bahut saare chhote-chhote sawal chalUs ladke ka naam mujhe aaj bhi yaad hai — Arun.
Pata nahi kyun, par kuch naam yaadein ban jaate hain.
Shayad isliye kyunki us din mere andar bahut saare sawal the.
Main piche seat par baithi thi…
aur saamne Mummy aur Arun baat kar rahe the.
Shayad wo bas normal baat kar rahe the…
par mujhe ajeeb lag raha tha.
Mujhe samajh nahi aa raha tha ki mujhe kya feel karna chahiye.
Bas ek chhoti si feeling thi —
ki main thodi door ho gayiCar me saamne Mummy aur Arun khushi-khushi baatein kar rahe the.
Unki hasi clear sunai de rahi thi.
Shayad unke liye wo bas normal baat thi…
par mere liye nahi.
Main piche baithi thi… aur mujhe Papa yaad aa rahe the.
Pata nahi kyun, par mujhe lag raha tha jaise humne Papa ko thoda sa left-out kar diya ho.
Jaise unki jagah kisi aur ne le li ho — kam se kam us car ke andar.
Un dono ko saamne baith kar haste dekhna mujhe achcha nahi lag raha tha.
Main chup thi.
Par andar bahut saare chhote-chhote emotions chal rahe the —
jealousy nahi… bas confusion… aur Papa ki yaad.Shayad Mummy ne mehsoos kar liya tha ki main zyada soch rahi hoon.
Unhone mujhe apna phone de diya, taaki main busy ho jaun.
Main bhi chup-chaap usme lag gayi.
Thodi der baad hum Chandrapur pahunch gaye.
Wahan se kuch khane-pine ka samaan liya,
aur phir nadi ke paas jo baithne ki jagah thi, wahan jaakar baith gaye.
Main tab tak thodi normal ho chuki thi.
Bas ek sawal dimaag me ghoom raha tha —
"Ye uncle kaun hain?"
Khana khane ke baad wo aadmi wahan bench par let gaya
aur Mummy ki god me apna sir rakh diya.
Us pal meri saans jaise halki si atak gayi.
Mujhe bahut ajeeb laga.
Bahut bura laga.
Main chupke se rone lagi…
itna chupke ki kisi ko pata bhi nahi chala.
Shayad unke liye wo ek normal pal tha,
par mere liye nahi.
Mere liye wo ek aisa scene tha jise main samajh hi nahi pa rahi thi.Hum wahan se naav me bhi baithe,
phir wapas car me aa gaye.
Mujhe samajh hi nahi aa raha tha ki hum kahan ja rahe hain.
Dheere-dheere andhera hone laga…
aur shayad thakan se meri aankh lag gayi.
Jab meri aankh khuli, tab raat ho chuki thi.
Hum kisi ghar par ruk gaye the.
Wahan ek aunty bhi thi.
Aur jo uncle the, wo unhe "Mummy" keh rahe the.
Humne wahan ek din rukne ka decide kiya.
Raat ko main Mummy ke saath hi soyi.
Mujhe laga sab theek hai.
Lekin subah jab meri aankh khuli…
Mummy mere paas nahi thi.
Us pal mujhe phir se wahi ajeeb si feeling aayi —
jaise main kuch samajh nahi pa rahi hoon…
par dil ko thoda bhaari sa lag raha tha.Uske baad hum Nani ke ghar gaye.
Wahan lagbhag teen din rukhe.
Par jo ajeeb si feeling mujhe pehle hui thi…
woh wahan bhi kabhi-kabhi wapas aa jaati thi.
Phir Papa ko pata chala ki hum Nani ke gaon me hain.
Papa aur chhote chachu wahan aane wale the.
Jab Mummy ko ye pata chala,
unke chehre par pehli baar maine ghabrahat dekhi.
Uske baad sab kuch bahut jaldi-jaldi hone laga.
Hum wahan se nikal gaye.
Mujhe samajh hi nahi aaya ki hum kahan ja rahe hain.
Shayad wapas Raigarh.
Wahi jagah jahan Mummy aksar rukti thi —
apni Masi ke gharRaigarh me ek din rukne ke baad
agle din hum Sarsiwa ke liye nikle —
jahan Papa pehle hi ja chuke the.
Jab hum Sarsiwa ke ghar ke thode door पहुंचे,
Mummy ne car rukwai.
Unhone mujhe dekha…
aur dheere se kaha,
"Beta, promise karo… tum ye sari baatein Papa ko nahi bataogi."
Us pal mujhe samajh nahi aa raha tha ki kya sahi hai, kya galat.
Maine "haan" bol diya.
Par andar hi andar…
maine decide kar liya tha —
ki Papa ko sach zaroor bataungi.
Shayad mujhe unka chehra yaad aa raha tha.
Shayad mujhe lag raha tha ki unhe pata hona chahiye.
Ek chhoti si bachchi ke dil me
pehli baar do alag-alag wafadariyan lad rahi thi.Jab hum ghar पहुंचे,
Papa ne humein bas ek baar ghoor kar dekha.
Unki aankhon me kya tha — gussa, dard, ya sawal —
main samajh nahi paayi.
Thodi si behes hui.
Bas chaar-paanch line.
Awaaz bhi zyada unchi nahi thi.
Par uske baad…
ghar me itni shanti chha gayi
jaise kisi ne sab awaazon ko band kar diya ho.
Pin-drop silence.
Na TV ki awaaz.
Na bartano ki khanak.
Na hasi.
Main bas idhar-udhar dekh rahi thi.
Mujhe lag raha tha jaise main kisi aise scene me khadi hoon
jahan sab log kuch jaante hain…
par main nahi.Ek din maine himmat karke Papa ko sab bata diya.
Main darr rahi thi…
par mujhe lag raha tha ki unhe sach pata hona chahiye.
Papa chup-chaap sunte rahe.
Phir maine dekha…
unki aankhen bhar aayi thi.
Wo shayad mujhe dikhana nahi chahte the,
par maine dekh liya.
Unhone dheere se kaha,
"Beta, mujhe ye sab pehle se thoda andaza ho gaya tha.
Isliye main gaon aaya tha.
Par tumne bata diya… to ab mujhe poora yakeen ho gaya."
Us pal mujhe samajh nahi aaya
ki maine sahi kiya ya galat.
Bas itna samjha —
Papa ki aankhon me jo paani tha,
wo sirf aansu nahi tha…
wo tootne ki awaazPapa ko shayad sab pehle se hi pata tha…
ki unke peeth ke peeche kya chal raha hai.
Isliye ghar ka mahaul dheere-dheere badalne laga.
Ab jhagde hone lage.
Kabhi dheere, kabhi tez.
Aur mera parde ke peeche chhup kar rona…
jaise routine ban gaya tha.
Kabhi main apne kaan band kar leti thi.
Kabhi aankhen.
Par awaaz aur ehsaas dono andar tak chale jaate the.
Shayad padosiyon ke liye bhi ye sab normal ho gaya tha.
Par mere liye har baar naya darr hota tha.
Ghar toot raha tha…
aur main samajhne ki umar me bhi nahi thi.Jhagde ke saath-saath ghar me kadwe shabd bhi gunjne lage.
Aise shabd jo shayad bade log gusse me bol dete hain…
par bachche ke dil par seedha lagte hain.
Kabhi mujhe lagta tha —
kya sirf mere hi ghar me aise shabd bole jaate hain?
Kya dusre gharon me log itni zor se ladte nahi?
Main parde ke peeche chhup kar baith jaati thi.
Kaash awaazon ko band kar sakti.
Par shabd deewar se takra kar wapas aa jaate the…
aur mere kaano me bas jaate the.
Dheere-dheere mujhe samajh aane laga
ki jhagde sirf do logon ke beech nahi hote —
unki goonj ghar ke sab logon tak pahunchti hai. Madarch#d bh#sd*ke esi esi shabdon ka prayog ho Raha tha Papa ne Mummy ko baar-baar call kiya,
par Mummy ne ek bhi call nahi uthaya.
Hame laga ki Mummy hume chhod ke sidha Dadi ke paas chale gayi.
Humne wahan phone kiya,
lekin wahan bhi pata chala ki Mummy wahan nahi hai.
Phir Raigarh me Masi ko call kiya — unhe bhi nahi pata tha.
Nani ke gaon me call kiya — wahan bhi koi update nahi mila.
Hum sochne lage ki shayad Dadi ke ghar chalna hi sahi hai.
Hum wahan chale gaye, lekin mann me chhupi hui tension ye thi:
kya Mummy wapas aa jaayengi?
Koi calls ya messages nahi aaye.
Main bas chupke se Papa ki taraf dekh rahi thi…
aur dil me sirf ek sawaal tha —
"Mummy kahaan hai?"Papa ne bas dheere se kaha,
"Mujhe sab malum hai."
Mere dimaag me sawaalon ki baarish ho gayi.
Maine phir pucha, "Papa… batao na… Mummy kahaan hai?"
Papa ne shayad mere bachpan ko samjha,
aur bade hi gently sirf itna kaha —
"Beta, kaam se kahi gayi hogi."
Unhone aur kuch nahi bataya.
Main bas chup ho gayi.
Par andar… ek chhota sa doubt, ek halki si udaasi…
dono saath me chal rahi thi.
Mujhe samajh nahi aa raha tha — sach kya hai,
aur Papa kaise sab samajh gaye bina bataaye.Winter vacation khatam ho gayi…
aur hum Sarsiwa wapas aa gaye.
Lekin Mummy abhi bhi wahan nahi aayi thi.
Ghar khali sa lag raha tha…
aur har cheez pehle jaisi nahi thi.
Main chupke se Papa ko dekh rahi thi…
unki aankhon me bhi halki si udaasi thi.
Dil me bas ye ek hi sawal tha —
"Mummy kahaan hai?"
Aur koi call, koi message… nahi aaya.
Us din mujhe sach me samajh aaya —
kabhi-kabhi, chhote bachche sirf intezaar kar sakte hain.Winter vacation khatam hui…
Sarsiwa wapas aa gaye…
phir summer vacation bhi aa chuki thi.
Lekin Mummy abhi bhi wapas nahi aayi thi.
Har din ka intezaar bas ek hi sawal lekar chal raha tha —
"Mummy kab aayengi?"
Papa ne mujhe khush rakhne ki puri koshish ki,
par andar se mujhe pata tha…
ghar me ek chhoti si khali jagah hai, jahan sirf Mummy ki kami mehsoos hoti hai.
School aur homework, doston ki baatein… sab kuch normal chal raha tha,
par meri aankhon aur dil me ek chhoti si udaasi har waqt thi Phir ek din jis kiraye ke ghar me hum rehte the,
us makan malik ka Papa ko call aaya.
Unhone seedha kaha —
"Aap log room khali kar dijiye.
Aap log shanti se nahi rehte.
Roz ke jhagde se padosiyon ko dikkat hoti hai."
Main paas hi thi.
Shayad Papa ne dheere awaaz me baat ki,
par kuch shabd mere kaano tak pahunch gaye.
Mujhe pehli baar laga
ki hamara jhagda sirf hamare ghar tak nahi tha —
woh deewar ke paar bhi sunai deta tha.
Ghar sirf eent aur deewar nahi hota…
par us din laga jaise hamara sahara bhi hil raha ho.
Main chup thi.
Par andar ek naya darr paida ho gaya —
"Ab hum kahaan jayenge?"Mummy ka tab tak koi ata-pata nahi tha.
Shayad Papa ko andar hi andar pata tha ki Mummy kahaan hai,
par unhone mujhe kuch nahi bataya.
Ghar khali karna hi tha.
Koi aur raasta nahi tha.
Papa ne bade dukh bhare mann se
mera aur apna samaan pack karna shuru kiya.
Main chup-chaap dekh rahi thi.
Pehli baar mujhe mehsoos hua
ki Papa sach me thak gaye hain.
Phir Papa ne Mummy ke school ke ek staff sir ko contact kiya.
Unhone kaha —
"Sir, hame turant ek room chahiye rent pe."
Un sir ka beta mera classmate aur dost tha.
Aur sach me… unhone hamari madad ki.
Hame ek achha sa room mil gaya.
Par Mummy phir bhi nahi aayi.
Hum contact karte rahe…
par jawab utna hi khamosh tha jitna pehle.Mummy ke na hone se main andar se thodi akeli ho gayi thi.
Papa school aur baaki cheezon me busy rehte,
par main zyada chup rehne lagi thi.
Shayad Papa ne mehsoos kar liya tha.
Isliye Dadi gaon se mere liye aa gayi.
Unke aane se ghar me thodi si awaaz wapas aayi —
rasoi ki khanak,
unki dheemi si baatein,
aur mere sir par unka haath.
Mummy ki jagah koi nahi le sakta tha…
par Dadi ne meri khamoshi ko halka zaroor kiya.Dadi gaon se aayi…
aur dheere-dheere mera aur unka bond itna strong ho gaya
jaise main unki poti nahi, unki saheli hoon.
Main unke paas baith kar sab bol deti thi —
school ki baatein,
mummy ki yaad,
papa ki tension…
Raat ko unke paas so jaati thi.
Unka haath mere sir par hota
to lagta sab theek ho jayega.
Mummy door thi…
par Dadi ne mujhe tootne nahi diya.Nayi jagah thi…
par dheere-dheere woh building bilkul TMKOC ke ghar jaisi lagne lagi.
Ek hi floor,
8 families ke rooms,
sabki awaaz sab tak pahunchti thi.
Gallery me bachchon ki daud,
auntyon ki baatein,
aur shaam hote hi pura mahal zinda ho jata tha.
Aur phir… meri apni "Tappu Sena" bhi thi 😂
Chhota sa gang —
koi chhotu, koi shararti, koi leader type…
par sab dil ke saaf.
Har din nayi planning,
kabhi ludo, kabhi pakdam-pakdai,
kabhi bina wajah hasi.
Us chhoti si building ne mujhe phir se hasna sikha diyaEk din hum sab mere dost ke ghar par the.
Chillana, hasna, masti —
jaise poori building ko bata dena ho ki hum zinda hain 😂
Awaaz itni zyada thi ki lag raha tha koi daantne aa jayega.
Tabhi…
ठक ठक ठक
Gate par kisi ne zor se knock kiya.
Sab ek second ke liye chup.
"Tu dekh ke aa…" kisi ne mujhe dhakka diya.
Main haste-haste gate ki taraf gayi…
handle pakda…
aur jaise hi darwaza khola —
Meri aankhein khuli ki khuli reh gayi.
Saans ek pal ke liye ruk si gayi...
Peeche mere dost abhi bhi has rahe the…
par meri duniya ek second ke liye bilkul chup ho gayi.
Mujhe samajh hi nahi aaya —
khushi thi?
shock tha?
ya darr?!