Lahore ki ek nanhi ladki thi jo bahut samajhdaar aur khoobsurat thi.
Uski kanji-kanji aankhen aur upar se uska surma lagana aisa lagta tha jaise falak se koi pari utar aayi ho.
Lekin ek raat mein sab badal gaya.
Yeh kahani ek aisi ladki ki hai jiska naam Sahar tha.
Sahar ek office mein kaam karti thi jo uske ghar ke paas hi tha.
Uska ek ajeeb sa shauk tha jiske liye woh bilkul pagal thi.
Uska poora din to office mein nikal jata, lekin raat ko woh apne kamre ke iklaute aayine ke saamne baithti aur khud ko aise niharti jaise woh shaadi ke jode mein baithi ho aur apne shauhar ka intezaar kar rahi ho.
Woh itni kho jaati ki agar koi use bulata bhi to na woh jawab deti aur na hi mud kar dekhti.
Ek din jab woh apne office se aakar khana kha rahi thi tabhi Ammi bol padi:
"Sahar, tujhe kal raat kya ho gaya tha?
Main tujhse apne shareer dard ki goli lene aayi thi lekin tune jawab hi nahi diya.
Ek baar bhi nahi socha ki uth kar pooch loon ke kya hua Ammi?"
Yeh sunte hi Sahar ke haath ka nivala wahi ruk gaya.
Sahar dheere se boli,
"Ammi… main to kal jaldi so gayi thi."
Uske parivaar ko yeh nahi pata tha ki Sahar raat ko aayine ke saamne baithti hai.
Tabhi uski Baji bol padi,
"Nahi Sahar, kal raat tum kya bol rahi ho?
Jab main tumhare paas doodh ka glass lekar aayi thi tab tum wahi baithi thi."
Yeh sunte hi Sahar ghabra gayi.
Woh bina kuch jawab diye seedha apne kamre ki taraf bhaagi.
Peeche se Ammi aur Baji awaaz dene lage,
"Sahar! Darwaza band mat karo!"
Lekin Sahar ne jhat se darwaza band kar liya.
Uski saanse tez chal rahi thi.
Uski nazar dheere-dheere kamre ke us iklaute aayine par padi.
Aaj pehli baar usse us aayine se darr lag raha tha.
Woh dheere-dheere aayine ke paas gayi aur usme dekha…
Aur uski aankhen darr se phail gayi.
Kyuki aayine mein uski parchai to thi…
lekin woh halka sa muskur rahi thi…
jabki Sahar bilkul bhi nahi muskur rahi thi.
Kamre mein achanak thandi hawa chalne lagi.
Aur phir aayine ke andar se ek dheemi awaaz aayi —
"Sahar… jis ka tum intezaar karti ho… woh aaj aa gaya hai…"
Sahar ka dil zor-zor se dhadakne laga.
Aur tabhi…
aayine ke andar se kisi ka haath bahar nikalne laga…