Govind Nagar Shahar ka naam sunane mein Govind Nagar shahar ka naam sunane mein chhota lagta hai per uski Raunak Kisi bade Shahar Se Kam nahin thi. Subah hote hi sadkon per auto rikshaw ki awaaz, chai ki tapriyon se uthi bhap aur logon ke kadmon ki jaldi-sab kuchh shahar ke Jinda hone ka saboot deta tha per isi bheed ke bich ek kone mein, jagah thi Jahan waqt jaisa ruk kar sans leta tha.
Woh jagah thi Govind Nagar Public Library.
Library ka darvaja lohe ka tha rang kabhi hara raha hoga per ab us par Jung ki parat jam chuki thi darvaje ke upar Laga board aadha tedha latak raha tha jismein kuchh Akshar MIT chuke the fir bhi roj subah 9:00 baje vah darvaja khulata tha bilkul waqt par.
Darwaza kholne wali ladki ka Naam tha Aanya.
Aanya roj apni cycle wahi gate ke pass khadi karti thi. Simple si cotton salwar kameez, baal hamesha ek dusre choti mein bandhe hue aur aankhon mein ek aise shaanti jo aam taur par sirf un logon mein hoti hai jo bahut kuchh seh chuke hote hain.
Usne tala khola darvaja dhakka dekar andar ki thandi si hawa ko mahsoos kiya. Library ke andar ghuste hi ek alag duniya thi- kitabon ke purane khushbu, lakdi ki shelves ka halka sa charmarana aur upar latakta hua peela bulb, jo hamesha thodi kam roshni deta tha.
Aanya ne apna bag counter par ke piche rakha, jhadu uthaya aur dheere -dheere poori library saaf karne lagi. Yeh uska roj ka ritual tha. Woh sirf Safai nahin karte thi; woh har shelf har kitab ko is tarah chhooti thi jaise koi apne purane doston se mil raha ho.
Kitabein uski duniya thi
Jab maa- papa chale gaye the, jab ghar achanak khali ho gaya tha,jab rishtedaar sirf formal sawaal pooch kar chup ho jaate the- tab yahi kitabein thi jo usse baat karti thi. Kisi ne use yeh nahi sikhaya tha ki dard ko lafzon main kaise badalte hain; usne yeh sab novels aur kahaniyon se seekha tha.
Library mein aane wale log jyada nahin the. Kuch students exam ke time, kuchh bujurg Jo subah ka akhbar padhne aate the aur kabhi-kabhi koi aisa insaan jo shayad tanhai se bachne ke liye yahan aa jata tha.
Log Aanya ko jante the par samajhte nahin the.
"Shaant ladki thi", koi kehta.
"Hamesha kitabon mein ghusti rehti hai", koi aur bolta.
Par kisi ne kabhi yeh nahi poocha ki woh itni shaant kyun hai.
Counter par baith kar kar Aanya ne register khola aur us din ki tareekh likhi. Uski handwriting saaf thi-har akshar theek jagah par, jaise zindagi ki bhi woh isi tarah line mein rakhna chahti ho.
Usne ghadi dekhi-9:17.
"Late ho gaya", usne khud se kaha aur shelf se kuchh newspapers nikaalne lagi. Tabhi uski nazar ek purani novel par padi-cover thoda phata hua tha, pages peele pad chuke the. Usne kitaab uthayi aur dheere se us par haath fera.
"Tum bhi purani ho gayi ho," woh muskurai.
Woh muskurahat halki si thi-jaise aadat ke taur par aa gayi ho,dil se nahi.
Aanya ki zindagi bhi kuch aisi hi thi-bahar se theek, andar se thodi si tooti hui.
College khatam hone ke baad usne bohot sapne dekhe the. Sheher se bahar jaane ke, kuch likhne ke, kuch apna banane ke. Par zindagi ne usse ek jagah par rok diya. Responsibility ke naam par, majburi ke naam par.
Aur Aanya ruki rahi.
Library ke bahar Shehar ka shor badhta ja raha tha andar se pages paltane ki awaaz aur kabhi-kabhi pankhe ka dheeme se ghumna sunai deta tha. Aanya ne chai ka cup up uthaya aur counter ke pass wali kursi per baith gayi.
Usne khidki se bahar dekha Aasman me badal the. Badal ghane ho rahe the barish aane wali thi. Use barish pasand thi barish mein Shehar thoda kam jhutha lagta tha.
Usne apni diary nikaali woh diary Jo vah kabhi kisi Ko nahin dikhati thi Pehle page per sirf ek line likhi thi:
"Kuchh Khamoshiyan shor Se jyada Sach bolati Hain"
Aanya ne kalam uthaya par likh nahin paayi. kabhi-kabhi jazbat itni jyada hote Hain ki lofz kam pad jaate hain.
Tabhi darwaje par halki si awaaz hui.
Library ka darwaja dheere se khula.
Aanya ne sir uthaya.
Bahar barish shuru ho chuki thi- tej nahin par lagatar. Aur darwaaje par silhoutte khada tha. Ek ladka bheege hue bal jacket se pani tapakta hua aankhon mein thakaan aur kuchh aisa...jaise woh yahan sirf kitab dhundhne nahin aaya ho.
Andar Aaye aur thoda sa jhijhak ke saath bola,
"Sorry.... library band toh nahi hui?"
Aanya ne pehli baar us din kisi ajnabi ko dekh kar dil se jawab diya.
"Nahi. Aaiye."
Ladka thada chain se saas leta hua andar aaya Usne apni jacket jhaadi aur idhar-udhar dekha- jaise woh kisi aur duniya mein aa gaya ho.
"Yahan... bohot shaanti hai," usne kaha.
Aanya ne sir hila diya.
"Yahan aksar aisa hi hota hai."
Us din Aanya ko nahi pata tha ji yeh sirf ek normal din nahi tha.
Yeh us kahani ka pehla panna tha- jo uski zindagi ko dheere -dheere likhne wali thi.